O IES AS
MERCEDES FUNCIONA, NON O DESINTEGREDES
O IES AS
MERCEDES NON DI ADEUS…
IES AS MERCEDES,
1/07/2013: a plataforma cidadá en
defensa do IES AS MERCEDES entrega hoxe máis de 10.000 sinaturas en defensa do
IES
Despois de tres meses de reivindicación continuada sen que o Sr.
Conselleiro de Educación teña tido sequera media hora para atender a esta
Plataforma, este acto de entrega de máis de 10.000 sinaturas de apoio ao IES AS
MERCEDES neste rexistro da Delegación da Xunta en Lugo representa para esta
plataforma cidadá, non só a vontade da cidadanía de Lugo de manter este
Instituto Público de Ensino Medio na zona Sur de Lugo, senón ademais:
· a vontade do
conxunto da cidadanía de Lugo de non querer resignarse ante unha decisión
cargada de arbitrariedade ao non contar (ou non querer mostrar, nin a nós nin
ao valedor do pobo) os estudos e informes sobre os que o Director Xeral de
Educación, o Sr. Corredoira, fundamentou a súa proposta de suprimir o IES AS
MERCEDES;
· a vontade
da cidadanía de Lugo de non resignarse a aceptar que, coa escusa dunha
anunciada ampliación da oferta no ámbito da Formación Profesional, teñamos que
seguir aceptando esta política de recortes en materia de educación que, para
non ter que contratar novo profesorado co que cubrir as baixas de xubilación,
non repara en pechar outro Instituto Público de Ensino Medio (o segundo en dous
anos na cidade de Lugo), sen sequera ter estudado previamente nin as necesidade
educativas dunha zona cun continuado crecemento da súa poboación escolar nin
tampouco as alternativas a disposición da Administración, ou sen importarlle
para nada o dereito de pais e alumnos a un ensino de calidade que se vai ver
moi comprometida e mermada pola masificación de alumnado nos Centros de
acollida;
· a vontade
dunha cidadanía de Lugo de non resignarse a seguir aceptando unha política de
recortes en materia de educación e que, neste caso, se converte en inaceptable
despilfarro ao
- non tomar en
consideración a existencia de subvencións aos centros concertados da zona,
- non valorar as
inversións realizadas no aulario, Biblioteca e Laboratorios de ESO e BAC deste
IES AS MERCEDES;
- ao non ter en conta
que, a non menos de 300 m do IES AS MERCEDES, ten a Consellería de Traballo un
Centro de Formación Profesional Ocupacional, perfectamente dotado de aulas e
equipamento, que neste momento, contando unicamente cun director e un xefe de
Estudos, está claramente infrautilizado como centro público de ensino.
Por ultimo, dende
esta plataforma en defensa do IES AS MERCEDES, queremos que esta entrega de
sinaturas represente así mesmo a vontade de todos nós por termos no Partido
Popular unha representación política máis sensible cos problemas da cidade que
a que, neste coma noutros conflitos, teñen manifestado a Xefa Territorial, o
Delegado Territorial de Educación e o seu candidato á Alcaldía de Lugo.
O IES AS MERCEDES NON DI ADEUS. A reivindicación, unha vez xa en marcha
o novo CIFP, entra noutro tempo, pero continúa: continuará ata que nesta zona
Sur de Lugo volvamos a ter o Instituto Público de Ensino Medio que se necesita e é de xustiza e porque ningunha
ampliación da oferta educativa de FP ten que ser incompatible coas ensinanzas
da ESO e BAC.
CONFÍAMOS EN QUE A
ADMINISTRACIÓN DE XUSTIZA SEXA QUE DE REXEITAR ESTA ARBITRARIEDADE; E CONFÍAMOS
TAMÉN EN LOGRAR OUTRA POLÍTICA.
O IES AS MERCEDES NON DI
ADEUS…
Nenhum comentário:
Postar um comentário