NOTA DE PRENSA:
O IES AS MERCEDES
FUNCIONA, NON O DESINTEGREDES (8/06/2013)
“A Consellería de Cultura, Educación e Ordenación
Universitaria, implantará o vindeiro curso 2013/2014 por primeira vez a
Formación Profesional a distancia no CIFP As Mercedes, cumprindo así o compromiso
de reforzar a súa oferta de ciclos formativos tras a súa conversión en Centro
Integrado de Formación Profesional.
En concreto, o CIFP As Mercedes ofertará para o
vindeiro curso na modalidade a distancia o ciclo de grao superior de Transporte
e Loxística, un dos primeiros ciclos formativos adaptados á Lei das
Cualificacións Profesionais que se implantan en Galicia este curso da familia
profesional do Comercio e Márketing. Así mesmo, e xa na modalidade presencial,
o centro incorporará os ciclos de grao superior en Márketing e publicidade, e o
de desenvolvemento de proxectos de instalacións térmicas e fluídos.
Esta nova oferta suporá un incremento de 102
prazas no centro, o que demostra o acertado da súa conversión en CIFP para dar
resposta ao crecente interese das galegas e galegos na FP. A oferta deste
centro irase incrementando conforme o Ministerio vaia completando o catálogo de
titulacións e se avance na remodelación dos talleres as Mercedes.”
Este é o anuncio que na tarde
de onte a Consellería de Educación colgaba na súa paxina web (http://www.edu.xunta.es/web/node/9579).
En resume:
-un ciclo a distancia de transportes
(un ciclo que, na modalidade presencial (LOXSE), xa houbo no IES AS MERCEDES e
que foi suprimido unilateralmente pola propia Consellería) que só necesita
un espazo para 2 ordenadores e o correspondente profesorado;
-un ciclo de Marketing que é o
resultado de adaptar á nova normativa LOE o ciclo de Marketing que actualmente
se imparte no IES AS MERCEDES. Ciclo do que non está publicado nin siquiera
o borrador do currículo no DOG, e que supoñemos que arrincaría co Decreto do
MECD, cando as transferencias en materia de Educación onde vai que están
transferidas á Comunidade Autónoma.
-e un ciclo presencial denominado “Desenvolvemento de Proxectos de
instalacións térmicas e fluídos”, que se trata dun ciclo de deseño por
ordenador que non necesita de máis equipamento que un aula e ordenadores.
Un ciclo ademais que, pola súa especialización e especificidade, resulta de moi
dubidosa utilidade no entorno socioeconómico de Lugo e provincia e mesmo en
Galiza: a realidade é que este ciclo actualmente só se imparte en Coruña e,
maioritariamente, con alumnado de segunda e terceira opción que non obtiveron
praza no ciclo de primeira opción dadas as escasas competencias profesionais
para as que habilita o título.
Minte, pois, a Consellería cando
fala de 102 novas prazas e minte sobre todo e con absoluto descaro cando di que
“demostra o acertado da súa conversión en
CIFP para dar resposta ao crecente interese das galegas e galegos na FP”, pois toda esta oferta, como temos manifestado reiteradamente, cabe
perfectamente nas instalacións actuais, sen necesidade sequera de acometer a
ampliación e mellora de talleres que a Consellería tiña comprometida.
A Consellería de Educación en
absoluto pode argumentar que a mesma sexa incompatible coa continuidade da ESO
e o BAC e non fai máis que confirmar de forma indignamente cínica que a
transformación do IES AS MERCEDES nun Centro Integrado de Formación Profesional
non é máis que unha escusa para cerrar un Instituto Público de Ensino Medio, -o
segundo en dous anos na cidade de Lugo.
Dende a plataforma en Defensa do
IES AS MERCEDES seguimos manifestando que sen estudos e informes previos sobre
as necesidades educativas que se necesitan atender e sen un estudo sobre as
diferentes alternativas á disposición da Xunta coas que atender á tais
necesidades, a supresión do IES AS MERCEDES constitúe unha arbitrariedade que,
tratándose dun servizo público básico, ningunha sensibilidade democrática pode
consentir. Así o ten entendido xa unha boa parte da poboación de Lugo; así o teñen entendido tamén o Pleno do
Concello de Lugo e o Pleno da Deputación Provincial, así como os tres grupos da
oposición no Parlamento de Galicia que, unanimemente, teñen apoiado esta
reivindicación no Parlamento. E así o agardamos que o entenda a Administración
de Xustiza.
.
Esta Plataforma pola defensa do
IES AS MERCEDES así o seguirá reivindicando, por dignidade e por xustiza. O IES
AS MERCEDES NON DI ADEUS!
Por certo,
agás o Inspector do centro, ninguén na Xefatura Territorial nin na Consellería
de Educación se deu por enterado da concesión ao IES As Mercedes do primeiro
premio no certame do Cooperativismo no Ensino 2013. Parece ser que nesta
situación interesa menos.
Nenhum comentário:
Postar um comentário