É un dos autores de cabeceira para moita
xente que ama a literatura no noso Centro. Premiado nacional e
internacionalmente polo seu labor como escritor ou tradutor, as súas palabras
chegan cargadas de saber, de solidariedade e da claridade que
tanto se estraña nos tempos que corren.
Tes unha vinculación coa cidade de Lugo xa abondo longa para que
nos poidas contar algún momento, se o tes a ben, no que a túa biografía se
cruzou co IES “As Mercedes”.
Cruzouse e crúzase. Teño
amigos traballando alí, e mesmo un familiar moi próximo, e moitos fillos de
amigos estudando no centro, antes e agora. Ademais algunha vez teño ido dar
algunha charla ou algún recital, hai bastantes anos xa.
Estrañouche a fulminante decisión da Xunta de pechar o noso
instituto? Por que?
Estrañoume si e non. Por unha
banda, trátase dun centro que me parece moi necesario, mesmo esencial polas
súas singularidades, na rede de ensino público de Lugo, pero por outra banda
hoxe a Xunta pódese esperar calquera cousa, pois está moi claro que milita
contra o ensino público e fai todo o posible para degradalo e favorecer así o
aumento do ensino privado.
¿Percibes que a reacción das institucións de Lugo e diso que se
dá en chamar agora “sociedade civil” está á altura das circunstancias?
A reacción do pobo (iso de
sociedade civil non me gusta moito dicilo) parece algo morna en relación coa
dimensión do problema. O burro di, segundo lin en Castelao: "mentres o pau
vai e vén, descansa o lombo". Pero non descansa, hoxe non descansa nada,
porque o pau vén con tanta frecuencia que o lombo se vai chagar como non se
escoucee o que ten a vara na man. En canto á reacción das institucións, calquera
apoio pode ter a súa importancia, pero o que realmente pode salvar o IES é a
loita popular.
Di o que queiras á comunidade escolar (alumnado, pais e
nais, profesorado e persoal non docente) do IES “As Mercedes”? Aceptamos, por
suposto, algún bo consello.
Consellos non sei dar, pero o
que si sei é que a situación é aínda máis grave do que parece, porque forma
parte dun plan a nivel mesmo mundial: a destrución de todos os aspectos sociais
do estado e a instauración dun estado represor, esencialmente policial e
militar, moi semellante ó que eran os estados no século XIX. E non por maldade
pura e desinteresada, senón por interese económico: o capital privado quere lucrarse
coa inmensa porción de actividade económica que representa o ensino, a sanidade
pública, o sistema de pensións e de protección social. A Xunta está nese plan
de contrarrevolución capitalista, e hai que telo en conta: a batalla pola
salvación d'As Mercedes é unha parte
da gran guerra de resistencia que temos que combater contra o capitalismo
salvaxe.
Sumamos este especial agradecemento aos que levamos trasladado
nos últimos días para todas as persoas que estades colaborando connosco. Recibe
unha forte aperta.
Nenhum comentário:
Postar um comentário